Bergþórulag dagsins: SANDKORN

Kristjana Stefánsdóttir mun flytja þetta lag af hárfínni nákvæmi á Minningartónleikunum.

Bergþóra bar allt tíð afar mikla virðingu fyrir skáldum, svo mikla að hún setti sinn fyrsta hljóðritaða texta undir dulnefni. En sá texta er að finna á Eintaki og heitir Sólarlag. Eftirgrennslan hjá Stef nýverið um rétthafa á textanum leiddi í ljós að Bergþóra var höfundur hans en ekki hinn dularfulli James. Það var því Bergþóru mikið gleðiefni þegar dóttir hennar ákvað að feta skáldaslóðir. Þegar Birgitta var svo valin yngst skálda til að birta ljóðið Sandkorn í nýjum skólaljóðum, fylltist Bergþóra móðurlegu stolti og samdi lag við ljóðið. 

Pálmi Gunnarsson syngur með Bergþóru í þessu útgáfu af laginu en þeirra samstarf var sem rauður þráður í gegnum allan feril Bergþóru. Á hljómplötunni Afturhvarf má meira segja finna lag eftir Pálma sem hann samdi til sonar síns Sigga.  

 Ljóð: Birgitta Jónsdóttir

Sandkorn í hafsjónum

sandkorn er ég aðeins

 

Í vindinum fýk ég

á vit hins óþekkta

 

Annars sig ég í fjöru minni

og horfi á hin sandkornin

Þau eru grá og föl

eins og ég

 

Öll erum við að bíða

eftir næstu vindhviðu

Miðar á Minningartónleikana

Þeir sem hafa áhuga á að tryggja sér miða í tíma á Minningartónleika Bergþóru Árnadóttur sem verða haldnir föstudaginn 15. febrúar næstkomandi geta keypt miða hjá midi.is. Einnig er bæði hægt að kaupa miða í afgreiðslunni hjá Salnum, á netinu salurinn.is og með því að hringja í síma 5700400. Miðasalan hjá Salnum er opin alla virka daga frá kl. 10 til 16. Ef þið smellið á slóðirnar taka þær ykkar beint á miðasöluna fyrir þessa tilteknu tónleika.

Það þarf vart að taka það fram að þessir tónleikar verða með öllu ógleymanlegir... bæði fyrir þá sem þekkja tónlistina hennar Bergþóru og þá sem fengu aldrei tækifæri til að kynnast tónlistinni hennar.

Bergþórulag dagsins: ÞRJÚ LJÓÐ UM LÍTINN FUGL

Ragnheiður Gröndal mun flytja þetta lag á Minningartónleikunum 15. febrúar. 

Þetta var síðasta lagið sem Bergþóra flutti opinberlega. Lagið flutti hún ásamt Hjörleifi í kirkjunni þegar sonur hennar gifti sig sumarið 2006. Röddin hennar var orðin stirð og hás en hún var enn sterk og blæbrigðarík. Hygg að sjaldan hafi hún flutt lagið af jafn mikilli ástúð og í það sinnið. 

Þegar þetta lag var flutt í Himnaför Bergþóru án söngs, var svo sláandi að gera sér grein fyrir að hún myndi aldrei aftur ljá lögum sínum röddina. Því er það svo stórkostlegt að fá allar þessar nýju raddir til að gæða lögin lífi á Minningartónleikunum. Það verður spennandi að heyra túlkun Ragnheiðar Gröndal á þessu lagi. Ljóðið er bara snilld og sennilega eitt af bestu ljóðum Tómasar.

Ljóð: Tómas Guðmundsson

 

I

 

Það vorar —fyrir alla þá, sem unna,

og enginn getur sagt, að það sé lítið

sem vorið hefur færzt í fang, og skrýtið

hve fljótt því tekst að safna í blóm og runna.

 

Og listamenn með litakassa og bretti

senn labba út í náttúruna og mála,

en ungu blómin drekka dögg og skála

til dýrðar sínum yndislega hnetti.

 

Ég þekki líka lind við bláan vog,

lítið og glaðvært skáld, sem daglangt syngur

og yrkir sínum himni hugljúf kvæði.

 

Og litlu neðar, einnig út við Sog,

býr Óðinshani, lítill heimsspekingur,

sem ég þarf helzt að hitta í góðu næði.

 

II

 

Hvað er að frétta, heillavinur minn?

—Hér hef ég komið forðum mörgu sinni,

og öll mín fyrstu óðinshanakynni

áttu sér stað við græna bakkann þinn.

 

Þá bjuggu hérna önnur heiðurshjón,

háttvís og prúð, og það er lítill vafi,

að hjónin voru amma þín og afi.

En hvað þið getið verið lík í sjón.

 

Já, gott er ungum fugli að festa tryggð

við feðra sinna vík og mega hlýða

bernskunnar söng, sem foss í fjarlægð þrumar.

 

Og megi gæfan blessa þína byggð

og börnum þínum helga vatnið fríða,

fugl eftir fugl og sumar eftir sumar.

 

III

 

Ó, litli fugl, þú lætur einskis spurt?

Langar þig ekki að heyra, að veröld þín

var eitt sinn líka óskaveröld mín?

En af hverju var ég að fara burt?

 

Hér gleyma ungir dagar stund og stað,

og stríðið virðist enn svo fjarlægt þeim.

Hvað varðar líka óðinshanaheim

um Hitler, Túnis eða Stalíngrað?

 

Og hvernig ætti fugl við lygnan fjörð

að festa sér í minni degi lengur

þann heim, sem leggur úlfúð í sinn vana?

 

Og drottinn veit ég vildi, að slíkri jörð

sem vorri yrði breytt, fyrst svona gengur,

í bústað fyrir börn og óðinshana.  

Bergþórulag dagsins: GÍGJAN

Lay Low mun flytja þetta lag á minningartónleikunum 15. febrúar. Hlakka til að heyra hvernig röddin hennar mun blása nýju lífi í þetta lag. Þetta er eitt af uppáhalds lögum bloggstjórans:) Það er eitthvað við það sem fær mann til að langa að fara út í náttúruna og upplifa það sem ljóðið inniheldur. Bergþóru var þetta lag líka kært þó það væri ekki oft á tónleikaskrá hennar.

 

 

 Ljóð: Benedikt Gröndal

Nýjasta lagið, samið í júní 1983 og þótti bæði þungt og tormelt. Meira að segja sjálfri mér gekk illa að komast í samband við það, þar til í stúdíóinu, en þá…

B.Á.

 

Um undrageim í himinveldi háu

nú hverfur sól og kveður jarðarglaum. 

Á fegra landi gróa blómin bláu

í bjartri dögg við lífsins helga straum.

Þar dvelur mey hjá dimmu fossa tali

og drauma vekur purpurans í blæ,

og norðurljósið hylur helga sali,

þar hnígur máninn aldrei niðr í sæ.

 

Þar rísa bjartar hallir, sem ei hrynja,

og hreimur sætur fyllir bogagöng.

En langt í fjarska foldarþrumur drynja

með fimbulbassa undir helgum söng.

Og gullinn strengur gígju veldur hljóði 

og glitrar títt um eilíft sumarkvöld.

Þar roðnar aldrei sverð af banablóði,

þar byggir gyðjan mín sín himintjöld.

 

Bergþórulag dagsins: HIN MIKLA GJÖF

Magga Stína mun flytja þetta lag á minningartónleikunum. Það hefur verið smá töf á að miðarnir komist í sölu en vonandi munu þeir verða komnir í sölu eigi síðar en á morgunn. Það má eiginlega segja að það sé honum Hjörleifi að þakka að Bergþóra byrjaði aftur að flytja þetta lag á tónleikum. Hún var svo gott sem búin að gleyma þessari gömlu perlu af Eintaki þegar hann var nýbyrjaður að spila með henni á unglingsárum sínum. Því var þetta lag oftar en ekki með á dagskrá þegar þau spiluðu saman.

Það verður án efa skemmtilegt og áhugavert að heyra útfærslu Möggu Stínu á þessu lagi.

HIN MIKLA GJÖF 

Ljóð: Steinn Steinarr

Hin mikla gjöf, sem mér af náð er veitt

og mannleg ránshönd seint fær komist að, 

er vitund þess að verða aldrei neitt.

Mín vinnulaun og sigurgleði er það.

 

Margt getur skeð. Og nú er heimsstríð háð,

og hönd hvers manns er kreppt um stál og blý.

En eitt er til, sem ei með vopni er náð,

þótt allra landa herir sæki að því.

 

Það stendur af sér allra veðra gný

í annarlegri þrjósku, veilt og hálft,

með ólán sitt og afglöp forn og ný,

hinn einskisverði maður: Lífið sjálft.

 

 

Bergþórulag dagsins: SÝNIR

Svavar Knútur mun flytja SÝNIR á minningartónleikunum. Þeir sem ekki þekkja þennan stórgóða söngvara ættu að kíkja á myspace síðuna hans: http://www.myspace.com/mrknutur 

Steinn Steinarr var Bergþóru afar hugleikinn, segja má að á einhvern hátt endurspegluðu ljóðin hans sem hún valdi til að veiða lög úr, hennar upplifun á sjálfri sér. Stundum er maður ekki viss hvar mörkin liggja á milli Steins og Bergþóru í þessu skapandi samstarfi á bak við tímans dökka djúp... 

Ljóð: Steinn Steinarr

Ég sit og hlusta hljóður

á húmsins dularmál,

Sýnir og draumar frá horfnum heim,

hópast að minni sál.

 

Mér birtist aftur æskan,

sem ól minn kjark og þrótt.

Á bak við tímans dökka djúp

dveljum við saman í nótt.

 

Og löngu dánir draumar

í dýrð sinni ljóma á ný.

— Golan þýtur í greinum trjánna,

gleðin er björt og hlý.

 

—Trú, sem er týnd og grafin

í tímans Stórasjó.

Draumar sem hurfu út í veður og vind,

vonin, sem fæddist og dó.

 

Ég sit og hlusta hljóður

á húmsins dularmál. —

Ég er dæmdur í útlegð, uns ævin þver

og eilífðin fær mína sál.

 

Bergþórulag dagsins: DRAUMUR

Á tónleikunum 15. febrúar mun Hansa flytja Drauminn. Þetta lag var mömmu sérstaklega hjartfólgið vegna þess að hún tileinkaði pabba það og flutti það í minningarathöfninni hans á sínum tíma. Ljóðið er eftir Stein Steinarr en þegar maður skoðar öll lögin hennar Bergþóru kemur í ljós að ekkert skáld varð henni eins gjöfult til tónsmíða eins og hann.

Ljóð: Steinn Steinarr

Lag: Bergþóra Árnadóttir

 

Þú komst af akri þínum, þá var kvöld

og það var ekki neinu fleiru að sinna.

Þú settist hljóðlátur við húss þíns eld

og horfðir milt á leiki barna þinna.

 

Og allt var kyrrt og rótt. Þig sótti svefn.

Þú sofnaðir á næstum augabragði

og dreymdi, að þú gekkst á akur þinn

og einhver vegfarandi kom og sagði:

 

Manstu þann dag, eitt löngu liðið vor?

Í lágum dyrum kotsins stóðstu feiminn

og heyrðir blóð þitt þjóta þyrst og ung.

Og það var köllun þín, að sigra heiminn.

 

Svo hélztu af stað sem hjartað sagði þér.

Þitt hugrekki gat enginn máttur þvingað.

Þig skorti hvorki vit né þrek í þraut.

Og þú ert ekki kominn lengra en hingað.

 

Þá hrökkstu upp, og hljótt var kringum þig.

Og húmið skyggði silfur þinna hára

sem gamalt ryk. Það var sem værir þú

að vakna upp af svefni þúsund ára.

 

 

Heildarútgáfan kemur út í febrúar

Heildarútgáfa á tónlist Bergþóru Árnadóttur mun koma út í kringum 7. febrúar næstkomandi. Þetta verður vegleg útgáfa og vafalaust kærkomið fyrir þær fjölmörgu manneskjur sem hlustuðu á hljómplötur á sínum tíma en hafa fyrir margt löngu sett plötuspilarann í ruslið.

Læt hér fylgja með nokkrar myndir úr bæklingunum fína sem er 64 síðna og inniheldur tónlistarsögu Bergþóru og alla texta og ljóð ásamt miklum fjölda mynda. 

Dimma gefur út: dimma.is, heildarsafnið mun fást í öllum "betri" hljómdiskaverslunum. 

 

 

Bergþóra Árnadóttir - Heildarútgáfa

Lagalisti

Eintak 1977

1. Júdas (BÁ/Björn Bragi) 3:38

2. Dánarfregn  (BÁ/Steinn Steinarr) 2:22

3. Verkamaður (BÁ/Steinn Steinarr) 3:03

4. Sólarlag (BÁ/James G. Johnson) 3:38

5. Ein á báti (BÁ/Herdís Andrésdóttir) 3:16

6. Gott áttu veröld (BÁ/Tómas Guðmundsson) 2:23

7. Ráðið (BÁ/Páll J. Árdal) 2:55

8. Nótt (BÁ/Björn Bragi) 2:50

9. Hin mikla gjöf (BÁ/Steinn Steinarr) 2:19

10. Þorlákshafnarvegurinn (BÁ/Fáfnir Hrafnsson) 4:43

11. Hinsta ferðin (BÁ/Björn Bragi) 2:05

 Aukaefni:

12. Eftirmæli (BÁ/Steinn Steinarr)   3:05 Í kjallaranum - Sjónvarpið1976

13. Vögguvísa (BÁ/Páll Ólafsson)  1:52 Í kjallaranum - Sjónvarpið1976

14. Vöggugjöf (BÁ/Steinn Steinarr) 2:26 Í kjallaranum - Sjónvarpið1976

15. Þrá (BÁ/Björn Bragi)                  2:06 Hrif 2 1976

16. Ég elska (BÁ/Páll J. Árdal)     2:36 Hrif 2 1976

17. Blátt svo blátt (BÁ/Kristinn Reyr)  2:55 Eitt verð ég að segja þér... 1979

18. Eftirskrift (BÁ/Aðalsteinn Ásb. Sigurðsson)  2:22  Særö, Svíþjóð - júní 1980

19. Hvað gerum við? (BÁ/Aðalsteinn Ásberg Sigurðsson) 2:46 Heyrðu 1981

20. Draumur (BÁ/Steinn Steinarr)  4:40 Heyrðu 1981

21. Jól  (BÁ/Steinn Steinarr)  3:20 Jólasteinn 1981

 

Bergmál 1982  

 

1. Ljóð án lags (BÁ/Steinn Steinarr) 2:53

2. Sigur (BÁ/Herbert Kaufmann-Jón Bjarklind)  2:28

3. Barnið í þorpinu (BÁ/Davíð Stefánsson) 4:25

4. Löngun (BÁ/Aðalsteinn Ásberg Sigurðsson) 2:06

5. Sýnir (BÁ/Steinn Steinarr) 2:30

6. Vorið kemur (Ingunn Bjarnadóttir/Kári Tryggvason) 1:50

7. Vinur að deyja (BÁ/Páll J. Árdal) 3:35

8. Einu sinni þú (BÁ/Bergþóra Árnadóttir) 3:00

9. Hljóð streymir lindin í haga (BÁ/Steinn Steinarr) 2:30

10. Við (BÁ/Aðalsteinn Ásberg Sigurðsson) 2:26

11. Frændi þegar fiðlan þegir (BÁ/Halldór Laxness) 2:03

12. Þau gengu tvö (BÁ/Hannes Pétursson) 2:20

13. Eftirskrift (BÁ/Aðalsteinn Ásberg Sigurðsson) 1:55

14. Frá liðnu vori (BÁ/Tómas Guðmundsson) 3:09

15. Furða (BÁ/Aðalsteinn Ásberg Sigurðsson) 2:12

 Aukaefni:

16. Draumur minn (Lasse Tennander/Aðalsteinn Ásberg Sigurðsson) 2:35 Hálft í hvoru – Almannarómur 1982

17. Seinni tíma sálmalag (Aðalsteinn Ásberg Sigurðsson og BÁ) 1:15 Hálft í hvoru – Almannarómur 1982

18. Verkamaður (BÁ/Steinn Steinarr) 2:48 Hálft í hvoru – Almannarómur 1982

19. Kona (Gísli Helgason/Ólöf Sverrisdóttir) 3:30  Hálft í hvoru – Almannarómur 1982

20. Kvöldsigling (Gísli Helgason/Jón Sigurðsson)  3:46  Vísnakvöld í heimahúsi 1982

21. Gott áttu veröld (BÁ/Tómas Guðmundsson) 2:39 Hálft í hvoru - tónleikaupptaka í júní 1982

22. Sýnir (BÁ/Steinn Steinarr)  2:32 Hálft í hvoru - tónleikaupptaka í júní 1982

23. Hljóð streymir lindin í haga (BÁ/Steinn Steinarr) 2:37 Hálft í hvoru - tónleikaupptaka í júní 1982

24. Hvert afrek bróðir? (BÁ/Gunnar Dal)  4:05 Hálft í hvoru - tónleikaupptaka í júní 1982

 

Afturhvarf 1983 

 

1. Heimurinn og ég (BÁ/Steinn Steinarr) 1:46

2. Eftirmæli (BÁ/Steinn Steinarr) 3:12

3. Borgarljós (BÁ/Sigurður Anton Friðþjófsson) 3:31

4. Ofstæki (BÁ/Aðalsteinn Ásberg Sigurðsson) 2:46

5. Afturhvarf (BÁ/Steinn Steinarr) 5:06

6. “Siggi” (Pálmi Gunnarsson) 2:46

7. Móðursorg (BÁ/Jóhannes úr Kötlum) 3:52

8. Vöggugjöf (BÁ/Steinn Steinarr) 2:18

9. Gígjan (BÁ/Benedikt Gröndal) 3:19

10. Sviplega vinir hverfa (BÁ/Páll J. Árdal) 2:46

11. Kosningar (BÁ/Tómas Guðmundsson) 2:56

12. Vögguvísa (BÁ/Páll Ólafsson) 1:58

13. Lokasöngur (Sverre Kjellberg/Klaus Hagerup-Aðalsteinn Ásberg Sigurðsson) 2:23

 Aukaefni:

14. Hvert afrek bróðir? (BÁ/Gunnar Dal)  3:19 Hvað tefur þig bróðir? 1982

15. Hvar er friður? (BÁ/BÁ)   4:11 Á felgunni 1984

16. Þú sem vinnur (Bjarni Hjartarson/Jóhannes úr Kötlum)  2:34 Við sem heima sitjum 1984

17. Söngur Nikólínu (BÁ/Aðalsteinn Ásberg Sigurðsson) 1:35 Ævintýri úr Nykurtjörn 1984

18. Hvað veldur? (BÁ/Aðalsteinn Ásberg Sigurðsson) 2:25 Ævintýri úr Nykurtjörn 1984

19. Galdraþula (BÁ/Aðalsteinn Ásberg Sigurðsson)  1:10 Ævintýri úr Nykurtjörn 1984

20. Bjössi litli á Bergi (BÁ/Jón Magnússon)  2:23 Skólaljóð 1986

21. Brugðið á leik í nokkrum stökum  (Trad.arr.)   2:40 Skólaljóð 1986

 

 

Í seinna lagi 1987

 

1. Í daganna rás (BÁ/Aðalsteinn Ásberg Sigurðsson) 3:06

2. Manstu (BÁ/BÁ) 4:48

3. Hver hefur rétt? (BÁ/BÁ) 3:04

4. Tvenn spor (BÁ/Björn Bragi) 3:06

5. Draumur (BÁ/Steinn Steinarr) 4:48

6. Sumarið sem aldrei kom (eða tveir síðustu dagarnir í lífi Kauða) (BÁ/BÁ) 3:09

7. Glerbrot (BÁ/BÁ) 3:17

8. Sandkorn (BÁ/Birgitta Jónsdóttir) 4:17

9. Ljóð án lags (BÁ/Steinn Steinarr) 4:50

10. Frá liðnu vori (BÁ/Tómas Guðmundsson) 4:34

11. Linda (eða gloppa í Himnamálum) (BÁ/BÁ) 5:15

12. Verkamaður (BÁ/Steinn Steinarr)  3:17

13. Einu sinni þú (BÁ/BÁ) 3:12

14. Borgarljós (BÁ/Sigurður Anton Friðþjófsson) 3:35

15. Í seinna lagi (BÁ/Jóhannes úr Kötlum) 3:17

 Aukaefni:

16. Hveragerði (BÁ/BÁ) 4:28  Stúdíó Stemma 1987

17. Lífsbókin (BÁ/Laufey Jakobsdóttir) 3:35  Stúdíó Stemma 1987

18. Móðursorg (BÁ/Jóhannes úr Kötlum)  3:35  Stúdíó Stemma 1987

19. Gígjan (BÁ/Benedikt Gröndal)  3:29  Stúdíó Stemma 1987

20. Stjarnan (BÁ/BÁ)  3:17  Stúdíó Stemma 1987

 

Skref fyrir skref    1985 – 2005.

 

1. Þrjú ljóð um lítinn fugl (BÁ/Tómas Guðmundsson) 4:54  Það vorar 1985

2.     Lífsbókin (BÁ/Laufey Jakobsdóttir) 3:20  Það vorar 1985

3. Kotungur (BÁ/GuðjónWeihe) 2:56  Það vorar 1985

4. Sprengjan (BÁ/Sigfús Kristjánsson) 2:58  Það vorar 1985

5. Í seinna lagi (BÁ/Jóhannes úr Kötlum) 3:00  Það vorar 1985

6. Tvenn spor (BÁ/Björn Bragi) 1:56  Það vorar 1985

7. Þau gengu tvö (BÁ/Hannes Pétursson)  2:22  Tónleikaupptaka - Vísland 85

8. Mars (Trad. arr)  2:22  Tónleikaupptaka - Vísland 85

9. Nótt í erlendri borg (BÁ/Sigurður Anton Friðþjófsson) 3:25  Að vísu ... 1986

10. Ráðið (BÁ/Páll J. Árdal)  2:58  Stúdíó Stemma 1987

11. Hugsun (BÁ/BÁ)  4:08  Stúdíó Stemma 1987

12. Manstu (BÁ/BÁ)   4:53  Stúdíó Stemma 1987

13. Fugl í búri (BÁ/BÁ)  4:12  Landslagið 1989

14. Gott er að lifa (BÁ/BÁ)  2:35  Sjónvarpsupptaka 1990

15. Neptúnus (BÁ/BÁ)  3:38  Sjónvarpsupptaka 1991

16. Fagra veröld (BÁ/Tómas Guðmundsson)  3:22  Prufuupptaka – Danmörk 1993

17. Drømmen om kærlighed (BÁ/BÁ)  2:55  Hljóðversupptaka – Danmörk 2004

18. Þjóðarblómið (BÁ/Kristján Hreinsson)  3:58  Hljóðversupptaka – Danmörk 2005.

 

Fyrsta og sennilega eina

baráttulag Þorlákshafnar. Á þeim tíma sem þetta lag og ljóð kom til var Þorlákshafnarvegurinn nákvæmlega eins og kemur fram í ljóðtextanum. Höfundanafnið er dulnefni og vona ég að mínir gömlu kennarar fyrirgefi mér að birta þetta hérna án leyfis á blogginu hennar mömmu.

Jónas Sig, sonur Þorlákshafnar mun flytja þetta lag á tónleikunum ásamt Verkamanninum. Hann hyggur á að taka með sér ör blásarasveit til landsins en hann eins og mamma var, er búsettur í veldi Dana.

 

ÞORLÁKSHAFNARVEGURINN

Ljóð: Fáfnir Hrafnsson

Lag: Bergþóra Árnadóttir

Vegir liggja til allra átta,

en ekki þó til Þorlákshafnar.

Þar sem á að vera möl er drulla,

þar sem eiga að vera vegkantar er hraun.

 

Þú lítur út um glugga,

og sérð holu við holu.

Jafnvel gjótu og skurð, jafnvel gjótu og skurð.

Þú lítur út um gluggann og sérð gröf,

það vantar einungis krossinn, krossinn.

 

Náttúran er saklaus, ekki bjó hún til þennan veg,

þetta ódáðahraun vegakerfisins.

Hún er saklaus, sem nýfætt barn,

hún þarf ekki að óttast stefnu, stefnu.

 

Ég ákæri ráðherra samgöngumála,

sem fór í flugvél til að skoða veginn,

þó flughræddur, þó flughræddur væri,

þó flughræddur væri hann.

Ekki þyrði hann að fara á bjúik sínum,

Þorlákshafnarveginn

því hann yrði öskuhaugamatur á eftir.

 

Vegir liggja til allra, allra átta …