Tónlist Bergþóru í nýjum búningi á minningartónleikum í Salnum

Fjórðu minningartónleikarnir um söngvaskáldið Bergþóru Árnadóttur verða haldnir í Salnum í Kópavogi þriðjudginn 15. febrúar kl. 20. Það er Minningarsjóður Bergþóru sem efnir til tónleikanna en þeir eru að vanda haldnir á afmælisdegi hennar.

Hægt er að kaupa miða hér: http://salurinn.is/default.asp?page_id=7502&event_id=8367

Að þessu sinni verða mörg af þekktari lögum Bergþóru flutt í fyrsta sinn í kórútsetning-um og koma þrír kórar við sögu, en stjórnandi þeirra er Guðlaugur Viktorsson. Um er ræða hinn landsþekkta Lögreglukór Reykjavíkur, Kór Menntaskólans í Reykjavík og Vox Populi. Einnig kemur söngvarinn Jónas Sigurðsson fram með Lögreglukórnum. Undirleik annast Gunnar Gunnarsson á píanó, Vilhjálmur Guðjónsson á gítar, Tómas R. Einarsson á kontrabassa og Hjörleifur Valsson á fiðlu. Þau Aðalheiður Þorsteinsdóttir, Bára Grímsdóttir, Skarphéðinn Hjartarson og Tryggvi M. Baldvinsson hafa útsett söng-lög Bergþóru fyrir karlakór og blandaða kóra. Kynnir á tónleikunum verður Aðalsteinn Ásberg Sigurðsson. Þess er að vænta að tónleikarnir verði einkar veglegir og því ætti enginn aðdáandi söngvaskáldsins góða að láta þá framhjá sér fara.

Bergþóra Árnadóttir (1948-2007) var einn af frumkvöðlum vísnatónlistar á Íslandi og lengi vel atkvæðamesta konan í hópi söngvaskálda. Hún samdi gjarna lög við ljóð þekktra skálda, en einnig tónlist við eigin texta. Á ferli sínum sendi hún frá sér allmargar hljómplötur og hélt fjölda tónleika hérlendis og í Skandinavíu.

Þess má geta að í febrúar er væntanlegur nýr geisladiskur með bestu lögum Bergþóru í hennar eigin flutningi, en einnig eru þrjú lög eftir hana á nýjum geisladiski Lögreglukórsins.
Lögreglukór Reykjavíkur var stofnaður 1934 en hann skipa starfandi og fyrrverandi lögreglumenn. Virkir félagar í dag eru 30 talsins og formaður kórsins er Hörður Jóhannesson, aðstoðarlögreglustjóri hjá lögreglunni á höfðuborgarsvæðinu. Núverandi stjórnandi, Guðlaugur Viktorsson, tók við stjórn kórsins árið 1990. Í tíð hans hefur starfið vaxið og er drifið áfram af metnaði og áhuga og óhætt að segja að á verkefnaskránni er ýmislegt annað en hefðbundin karlakóratónlist. Kórinn hefur notið vaxandi vinsælda á liðnum árum og verkefni hans hafa verið margvísleg. Tvívegis hafa verið gefnir út geisladiskar með söng kórsins, árið 1999 og 2005. Síðari diskurinn var gefinn út í 5000 eintökum og er nú uppseldur. Starfsemi kórsins er fjármögnuð með framlögum kórfélaga sjálfra og tilfallandi styrkjum. Væntanlegur er innan tíðar nýr geisladiskur með tónlist sem er sérstaklega útsett fyrir kórinn Á þeirri efnisskrá er tónlist eftir Megas, Bubba, KK, Hörð Torfason, Bergþóru Árnadóttur ofl.

Kór Menntaskólans í Reykjavík hefur starfað um langt árabil, lengi vel undir stjórn Marteins H. Friðrikssonar fyrrum dómorganista, en frá árinu 2006 undir stjórn Guðlaugs Viktorssonar. Kórinn hefur fyrst og fremst flutt klassísk verk íslenskrar kórtónlistar í bland við klassískar perlur norrænnar og evrópskar kórtónlistar. Kórinn syngur reglulega tónleika á aðventu og síðan að vori. Hann hefur ferðast nokkuð og tók árið 2007 þátt í kórakeppni í Hollands þar sem hann hlaut mjög góða dóma fyrir söng sinn. Kórinn hefur farið stækkandi ár frá ári og telur nú um 80 félaga. Næsta vor stefnir kórinn á þátttöku í kórakeppni í Tallin í Eistlandi.

Vox Populi er sönghópur sem var stofnaður 2008 af hópi ungs fólks sem flest hafði kynnst í gegnum kórstarf í Borgarholtsskóla undir stjórn Guðlaugs Viktorssonar. Hópurinn vildi fyrst og fremst syngja rythmískari tónlist. Í fyrstu var hópurinn aðeins 10 manns en hefur farið fjölgandi ekki síst nú á þessu starfsári þar sem kórinn hefur endurnýjað tengsl sín við nemendur Borgarholtsskóla. Í stuttu máli, hæfileikaríkur hópur ungs fólks á uppleið, sem flutt hefur leikhús og söngleikjatónlist auk annarar fjölbreyttrar tónlistar.

Fyrsta Trúbatrixa Íslands

Bergþóra Árnadóttir var fyrsta trúbatrixa Íslands og ruddi veginn fyrir aðrar slíkar. Það var með sanni á brattann að sækja þegar hún hóf sinn feril enda tónlistarheimurinn afar karllægur. Þegar maður lítur yfir farinn veg - rannsakar blaðaskrif um tónlist Bergþóru er augljóst að Bergþóra fékk ekki verðskuldaða athygli fyrir sín störf sem trúbatrixa miðað við karlmenn sem voru að gera áþekka hluti í tónlistarheimum.

Það hefur ekki gengið þrautalaust að koma á framfæri tónlist Bergþóru þó flestir sem maður ræðir við telja hennar þátt í tónlist ekki síður markverðan en annarra sem hafa rutt brautina en ekki síst þótti hún afbragðs tónsmiður og flytjandi, sér í lagi þegar hún var ein á ferð. Hún var undir hælin lögð eins og margar kynsystur hennar þegar kom að afskiptum karlmanna á hennar hugans verk.

Ég rita þetta vegna þess að í gærkvöld voru haldnir eftirminnilegir tónleikar til heiðurs Bergþóru en ekki tókst að fá neina umfjöllun um þá í fjölmiðlum landsins. Því misstu margir af því tækifæri að fá að heiðra minningu Bergþóru í gær með nærveru sinni. En tónleikarnir voru í boði Minningasjóðs Bergþóru Árnadóttur. Sjóðurinn var stofnaður árið 2008 í kjölfar minningartónleika sem haldnir voru á 60 afmæli Bergþóru. Stofnfé sjóðsins kom frá aðgangseyri að þeim tónleikum sem og STEFgjöldum barna Bergþóru.

Stofnun sjóðsins hefði ekki verið möguleg ef allir tónlistarmennirnir sem komu að minningartónleikunum hinum fyrri ásamt þeim sem tóku þátt í gær hefðu ekki verið svo göfuglyndir að gefa alla sína vinnu. Aðstandendur sjóðsins eru listafólkinu innilega þakklátir en þeir hafa með sínu frábæra framtaki tryggt að tónlist Bergþóru fær að glæðast nýju lífi og öðlast nýja vídd.

Markmið sjóðsins er einfalt: að varðveita tónsmíðar Bergþóru og miðla þeim til almennings á margvíslegan hátt ásamt því að viðhalda minningu hennar með ritun ævisögu söngvaskáldsins.

Yfirstandandi verkefni sjóðsins er að yfirfæra flest lög Bergþóru á nótur og gefa þær út. Þá stendur til að setja saman ævisögu Bergþóru sem og að gefa út upptökur af tónleikum sem haldnir voru í Salnum og Grafarvogskirkju árið 2008 til að heiðra minningu Bergþóru.

Nánari upplýsingar um þessi verkefni og feril Bergþóru er að finna á eftirfarandi vefsvæðum: bergthora.blog.is, myspace.com/bergthoraarna, groups.to/bergthora

Árið 2008 gaf Dimma út heildarútgáfu af tónlist Bergþóru - en þar er að finna allar hljómplötur Bergþóru ásamt útgáfutæku aukaefni.

 

Minningartónleikar Bergþóru Árnadóttur

Minningartónleikar um söngkonuna og tónsmiðinn Bergþóru Árnadóttur verða haldnir í Fríkirkjunni í Reykjavík sunnudaginn 15. febrúar kl. 20 Á tónleikunum verður eingöngu flutt efni eftir Bergþóru en tónleikana ber einmitt upp á afmælisdag hennar.

Þeir listamenn sem heiðra minningu Bergþóru að þessu sinni eru: Eyjólfur Kristjánsson, Ellen Kristjánsdóttir, Eyþór Gunnarsson, Hjörleifur Valsson, Guðrún Gunnarsdóttir og Valgeir Skagfjörð, Kristjana Stefánsdóttir, Svavar Knútur og þríeykið Elín Ey, Myrra Rós og Marta Sif, sem allar standa framarlega meðal ungra og upprennandi íslenskra söngvaskálda.

Á tónleikunum verður ennfremur brugðið upp mynd af Bergþóru gegnum stuttar frásagnir frá samverkamönnum, þar sem varpað verður ljósi á hina mannlegu þætti í hennar listamannsferli, hvort sem um er að ræða tregafulla eða gleðilega. Leitast verður við að sýna fram á þau áhrif sem Bergþóra hafði sem listamaður og einnig hvernig hún snerti líf samverkamanna sinna.

Það er nýstofnaður minningarsjóður um Bergþóru sem stendur að tónleikunum. Sjóðurinn var stofnaður í framhaldi af tvennum velheppnuðum tónleikum sem haldnir voru á síðasta ári og í kjölfar veglegrar heildarútgáfu með verkum söngkonunnar, en tilgangur sjóðsins er að stuðla að því að tónlist Bergþóru og minning lifi meðal þjóðarinnar.

Bergþóra Árnadóttir (1948-2007) var einn af frumkvöðlum vísnatónlistar á Íslandi og lengi vel atkvæðamesta konan í hópi söngvaskálda. Hún samdi gjarna lög við ljóð þekktra skálda, þ.á.m. Steins Steinarrs, Tómasar Guðmundssonar og Jóhannesar úr Kötlum. Á ferli sínum sendi hún frá sér sér allmargar hljómplötur og hélt fjölda tónleika hérlendis og í Skandinavíu.

Miðaverð krónur 1.500 og fer forsala aðgöngumiða á minningartónleikana fram á vefsíðunni midi.is.

Eina jólalag Bergþóru Árnadóttur

Bergþóra samdi aðeins eitt jólalag. Lagið samdi hún við ádeiluljóð Steins Steinars á jólin. Ætla mætti að Bergþóra hafi ekki verið mikið jólabarn vegna þessa en því fór fjarri. Hún hafði dálæti á boðskap jólanna, en fyrirleit rétt eins og skáldið góða - græðgina sem hafði verið spyrnt við þessa hátíð friðar og ljóss. 

Setti lagið góða í tónhlöðuna, en það er aðeins fáanlegt sem aukalag á einum af diskunum fimm í heildarsafni tónlistar Bergþóru sem kom út fyrr á þessu ári. Lagið kom út á smáskífu sem heitir Jólasteinn og rann út eins og jólaglögg ein jólin fyrir margt löngu. Hér er svo ljóðið, það hefur alltaf vakið ákveðna kátínu hér á bæ.

Jól
Ljóð: Steinn Steinarr

Sjá, ennþá rís stjarnan, sem brennur björtust og mildust
á bládjúpum miðsvetrarhimni hins snæþakta lands.
Sjá, ennþá nálgast sú hátíð, sem hjartanu er skyldust
og huggar með fagnaðarsöngvum hvert angur manns.

Og innan skamms byrjar kappát í koti og höllu,
og klukknahringing og messur og bænagjörð.
Það er kannski heimskast og andstyggilegast af öllu,
sem upp var fundið á þessari voluðu jörð.

Og ger þú nú snjallræði nokkurt, svo fólkið finni
í fordæmi þínu hygginn og slóttugan mann:
Með kurteisum svip skaltu kveikja í stofunni þinni,
og kauptu svo sóknarprestinn og éttu hann.

Draumur Bergþóru ber af

Þó Bergþóra hafi haft lag á að semja lög við öll helstu skáld þjóðarinnar, þá var ekkert skáld henni eins kært og Steinn Steinarr, enda samdi hún fjölda laga við ljóð hans. Henni tókst að veiða lögin úr ljóðum hans þannig að saman voru urðu þessi verk í slíkum samhljómi að erfitt var að greina hver átti hvað. Enda hafa margir viljað kenna ljóðin við hana sem við höfum eftir föngum leiðrétt.

Nýverið kom út safn laga við ljóð Steins Steinars. Held að velflestir þeir sem hafa samið lög við ljóð skáldsins hafi átt þar lag. Það var því ánægjuefni að lesa umfjöllun þess efnis í Morgunblaðinu að lög Bergþóru þóttu bera af. Það var því miður þannig að Bergþóra fékk aldrei uppreisn æru sem tónsmiður í lifanda lífi og þó svo að hún sé horfin yfir móðuna miklu þá er það okkur aðstandendum hennar ærið verkefni að vekja athygli á þessum perlum sem hún skildi eftir. Ærið verkefni vegna þess að hún hætti nánast að semja lög eftir að hún hvarf til Danmerkur 1988, en þá var hún á hátindi ferils síns sem tónlistarmaður. 

Árið sem er að líða hefur verið einstaklega ánægjulegt fyrir okkur sem lifa hana, því segja má að hennar hafi verið minnst á víðtækari hátt en hún hefði nokkru sinni geta látið sig dreyma um.

Upprifjun um það í næsta bloggi: ætla að leyfa ykkur að heyra hið gullfallega lag: Draumur í flutningi Hönsu frá seinni Minningartónleikum Bergþóru í Grafarvogskirkju. 

 

 

Heiðurstóntónleikar í Hveragerði

Næstkomandi föstudagskvöld verður Tónlistarklúbbur Hveragerðis með sérstaka heiðurs- og minningartónleika um Bergþóru Árnadóttur, flytjendur m.a. Pálmi Gunnarsson, Labbi, Gummi Ben, Magnús Þór, Hara-systur og fleiri.

Dagskráin verður í Íþróttahúsinu og hefst um klukkan 20:00. Verður spennandi að sjá og heyra. 

Aukatónleikarnir

Minni alla á að nú fer að líða að aukatónleikunum til heiðurs Bergþóru Árnadóttur. Tónleikarnir verða á laugardaginn kemur og verða þeir haldnir í Grafarvogskirkju klukkan 20:30. Tónleikarnir verða með sama sniði og síðast en státa tveimur auka söngvurum: Páli Óskari og Jóni Tryggva Unnarssyni. Markmið okkar sem stöndum fyrir tónleikunum er að gefa tónlistarfólki vettvang og tónlistarlega umgjörð með hinu frábæra bandi sem Hjörleifur Valsson valdi saman, en hljómsveitina skipa: Ástvaldur Traustason á píanó, Birgir Bragason á bassa og kontrabassa, Björgvin Gíslason á gítar og sítar, Hjörleifur Valsson á fiðlu, Steingrímur Guðmundsson á slagverk og Tatu Kantomaa á harmonikku.

Okkar leið til að heiðra minningu Bergþóru er að hvetja annað tónlistarfólk flytja tónlistina hennar en lögin hennar eru tímalaus og völundarsmíð sem fallið getur inn í hvaða tónlistarstefnu sem er. Það sem ef til vill er einkennandi við lögin hennar er hin mikla virðing sem hún bar til ljóða en þau voru ómissandi efniviður laga hennar. 

Söngvar sem voru með síðast og verða með aftur: Ragnheiður Gröndal, Hansa, Magga Stína, Jónas Sig og Svavar Knútur 

AukaMinningartónleikar Bergþóru Árnadóttur

Miklu færri komust að á Minningartónleikana en vildu og því höfum við Hjörleifur Vals verið á fullu að púsla saman aukatónleikum og nú erum við loks búin að finna stað og stund. 

Aukatónleikarnir verða í Grafarvogskirkju, laugardaginn 5. apríl. Ekki er alveg víst hvort að settið verði á þessum tónleikum en þeir verða án efa alveg jafn magnaðir. Vil ekki setja nein nöfn fyrr en búið er að staðfesta við tónlistarfólkið en öruggt er að Magga Stína verður aftur með sinn ógleymanlega flutning. 

Við munum setja miðasöluna í gang strax eftir helgi á midi.is. Læt ykkur vita sem þyrstir í meira eða komust ekki þann 15. febrúar um leið og búið er að ganga frá samning við midi.is:)

Ættingjar og vinir sem lesið þetta, vinsamlegast látið þá vita sem ekki komust síðast. Það er skömm frá því að segja að meira segja bróðir Bergþóru fékk ekki miða á tónleikana, svo hratt runnu miðarnir út síðast. En kosturinn við Grafarvogskirkju er að það er hægt að stækka hana eftir þörfum, þannig að allir ættu að geta fengið miða núna. 

Mun setja inn á næstu dögum lagalista síðustu tónleika en þeim verður útvarpað á Rás 2 um páskana. 

Slóð í "Yfirlit yfir ævi Bergþóru Árnadóttur" í Kastljósi

 Æviágripið um Bergþóru í Kastljósi var vel úr garði gert. Þá er útfærsla Svavars Knúts á laginu hennar "Frá liðnu vori" alveg dásamleg. Held að þátturinn sé bara inni í tvær vikur, þannig að ég hvet alla sem ekki hafa séð þáttinn að kíkja áður en hann hverfur úr netheimum.

Yfirlit yfir ævi Bergþóru Árnadóttur

Bergþórulag dagsins: LÖNGUN

Í tilefni kærleiksdagsins: ástarlagið Löngun. Lagið verður sungið af Hönsu og Svavari Knúti á Minningartónleikunum á morgunn. Þetta lag er á breiðskífunni Bergmál og eru það Bergþóra og Aðalsteinn Ásberg sem syngja það saman. Aðalsteinn verður kynnir á tónleikunum. Hann er mikil fróðleiksnáma þegar kemur að tónlistarferli Bergþóru og var það hann sem skráði þá sögu fyrir Heildarútgáfuna. Hún mun vera á leið til landsins, náðist því miður ekki að fá hana til eyjunnar fyrir tónleika, vegna þess hve sérstætt boxið er sem hýsir diskana 5. En hægt er að fá safnið samt sem áður á kostakjörum á tónleikunum með því að skrá sig á þar til gerðan lista. 

 Í kvöld mun svo Svavar Knútur syngja Frá liðnu vori í Kastljósi, þá verður einnig viðtal við Hjörleif Valsson og Birgittu dóttur Bergþóru birt í þættinum.

Ljóð: Aðalsteinn Ásberg Sigurðsson

 

Ég vildi 

geta málað 

andlit þitt

á andlit mitt,

sakleysið 

í svip þínum

og orðin,

sem þú hvíslar

í eyra mér

svo blíð.

 

Ég vildi

geta talað

um vetrarkvöld

og sagt þér,

að söngur minn

er aðeins

samhljóma

einni mynd.

 

Og þegar 

vindar þjóta

um þögul hús

í bænum,

verða orð mín óskir

innan fjögra veggja.

 

Ég vildi

geta málað

andlit þitt

á andlit mitt

svo úr því fæddist

andlit okkar beggja.