Bergþórulag dagsins: GÍGJAN

Lay Low mun flytja þetta lag á minningartónleikunum 15. febrúar. Hlakka til að heyra hvernig röddin hennar mun blása nýju lífi í þetta lag. Þetta er eitt af uppáhalds lögum bloggstjórans:) Það er eitthvað við það sem fær mann til að langa að fara út í náttúruna og upplifa það sem ljóðið inniheldur. Bergþóru var þetta lag líka kært þó það væri ekki oft á tónleikaskrá hennar.

 

 

 Ljóð: Benedikt Gröndal

Nýjasta lagið, samið í júní 1983 og þótti bæði þungt og tormelt. Meira að segja sjálfri mér gekk illa að komast í samband við það, þar til í stúdíóinu, en þá…

B.Á.

 

Um undrageim í himinveldi háu

nú hverfur sól og kveður jarðarglaum. 

Á fegra landi gróa blómin bláu

í bjartri dögg við lífsins helga straum.

Þar dvelur mey hjá dimmu fossa tali

og drauma vekur purpurans í blæ,

og norðurljósið hylur helga sali,

þar hnígur máninn aldrei niðr í sæ.

 

Þar rísa bjartar hallir, sem ei hrynja,

og hreimur sætur fyllir bogagöng.

En langt í fjarska foldarþrumur drynja

með fimbulbassa undir helgum söng.

Og gullinn strengur gígju veldur hljóði 

og glitrar títt um eilíft sumarkvöld.

Þar roðnar aldrei sverð af banablóði,

þar byggir gyðjan mín sín himintjöld.

 

Athugasemdir

[Linda Linnet Hilmarsdóttir, 31.1.2008 kl. 09:45]

Þetta lag er afskaplega fallegt og eins textinn góður

[Linda Linnet Hilmarsdóttir, 31.1.2008 kl. 09:50]

Ef mig minnir rétt þá spilaði Pálmi svo ans....flott á kontrabassan í þessu lagiég hafði afskaplega gaman af þeim,þegar þau voru að spila á Norrænahúsinu um tíma og að mig minnir rétt með Tryggva Hubner á klassískan gítar,hét bandið ekki Aldrei Aftur?

[Bergþóra Árnadóttir - RIP 15.2.48 - 8.3.07, 31.1.2008 kl. 10:01]

Ég man ekki alveg hvað bandið þeirra hét, en þetta hljómar sem afar Bergþórulegt nafn:) Pálmi er alveg þrusugóður kontrabassaleikari. Hann mætti alveg spila miklu meira á hann:)

Bjartar kveðjur

Birgitta

[Ásthildur Cesil Þórðardóttir, 31.1.2008 kl. 14:04]

[Linda Linnet Hilmarsdóttir, 1.2.2008 kl. 01:25]

Ég er alveg sammála þér Birgitta mín,hann Pálmi vinur minn er þrusugóður kontrabassaleikari og hann mætti alveg spila oftar á það hljóðfæri.Pálmi á reyndar heiðurinn á mín kynni við tónlist Bergþóru,því hann bauð mér oft á þá tónleika þegar þau voru að spila á Norrænahúsinu á sínum tíma og svo gaf hann mér plötuna Afturhvarf sem mér fannst auðvitað dásamlegt,góð og notaleg plata með fallegum lögum og yndislegum söng.Takk fyrir mig.